Svínavatn 2009

Laugardaginn 6. mars 2010 verður haldið Ís-landsmót á Svínavatni í A-Hún. Mótið hefur verið það sterkasta og fjölmennasta sem haldið hefur verið á ís hérlendis undanfarin ár og  lítur út fyrir að þar verði engin breyting á. Fyrirkomulag verður með svipuðu sniði og verið hefur og verður það nánar auglýst síðar.

Nú að afloknu Ís-landamóti á Svínavatni er það helsta sem eftir stendur að mótið tókst í alla staði afskaplega vel. Veðrið var frábært, ísinn góður og dagskráin stóðst mjög vel, byrjað var á mínútunni kl. 9.30 og mótinu lauk um kl. 5.30 sem var heldur fyrr en áætlað hafði verið.

 Dagskráin var keyrð stíft áfram og ekkert mátti útaf bregða til að við lentum í tímahraki, en það er styðst frá því að segja að aldrei þurfti að bíða eftir knöpum og eiga þeir skilið sérstakt hrós fyrir það. Einnig stóðu starfsmenn, sem allir voru sjálfboðaliðar, sig frábærlega við að gera mótið svo vel heppnað og eru þeim hér með færðar bestu þakkir.

 Úrslit eru birt hér á síðunni fyrir neðan, en fyrir mistök voru þau ekki alveg rétt í fyrstu en hafa verið leiðrétt.

 Á mótinu voru 212 sýningar, 175 hestar tóku þátt og 110 knapar.

Upptökur frá mótinu verða aðgengilegar á hestafréttir.is fljótlega, en ekki tókst að senda beint út frá mótsstað.

Það er ekki hægt að hleypa af stokkunum jafn metnaðarfullum viðburði og Ís-landsmótið er án þess að hafa góða bakhjarla. Eftirtaldir styrkja mótið með einum og öðrum hætti og kunnum við þeim hinar bestu þakkir fyrir það.